#قصة_رائعة كان في وحدة زوجها كل يوم يجيب معه عالعشا صحن حمص .. مرته قالت له يا رجال غير هالعشا والله قرح قلبي من الحمص ... قلها لا يهمك يا مرة بكرة بجيب هبرة وبرغل لتعمليلنا شوية كبة فرحت ووافقت وتاني يوم راحت عند الجيران واستعارت جرن الكبة . المسا دخل زوجها ومعه صحن حمص طلعت بالصحن وقالت له لك مو قلتلي بدك تجيب هبرة ولحمة مشان كبة قلها بتعرفي يامرة قلت بدال الهبرة واللحمة بجبلك بحقن حلق دهب .. فرحت وثقبت أدنيها وقعدت بأرض الدار تستنا زوجها دخل وبإيده صحن الحمص وشافها قلها بتعرفي يامرة قلت احسن من الحلق الدهب شو رأيك أغيرلك البيت وأشتريلك أكبر منه فرحت كتير وتاني يوم قامت نضفت ومسحت هالعفش وضبته وربطته بالحبل . وقعدت تستنا زوجها بأرض الديار . دخل زوجها ومعه صحن الحمص وشاف العفش كله مضبوب ومربط . طلع فيها بحزن وحط صحن الحمص وطلع مهموم شافه رفيقه وزعل عليه وقال شبك ليش زعلان حكاله انه مرته عالبركة شوي وكل يوم بتطلب طلب وما عم تفهم إنو يادوب عم يقدر يشتري صحن الحمص صفن رفيقه وقله لك تعا خود هالبيت الكبير المهجور ماله صاحب لأنه بيقولو ساكنينه الجان وفيه جني كل ما حدا سكن فيه بيطلعله وبيجننه وبيسوح بهالدنيا خود مرتك عليه بركي بيطلعلا وبياكلا وبتخلص منها.. وافق الرجال عالفكرة ورجع ركض لعند مرته وقلها: يالله عالبيت الجديد فرحت وراحت مع زوجها ودار بالبيت وفعلا كان كبير بس وسخ ومهجور حطها هي والعفش وقلها نضفيه وانا برجع لعندك المسا وبتكوني خلصتي . قالت له ما تخاف علي للمسا بكون خلصت طلع الزلمة وهي ابتدت تنفض الغبرة وتطرق عالمخدات واذ بينطلها الجني وبيقلها 😁بع بع 😁 طلعت فيه وقالتلو وجع العين تطرقك ليش هيك عم تعيط .. منيح بعتك زوجي مشان تعيني .. بلا حكي فاضي امسك هالخرقة وابدا نضف الغبرة قبل ما يجي الرجال ...هاد الجني استغرب كيف ما خافت منه . قال برجع بعيد مرة تانية بيظهر ما انتبهت وصرخ بصوت عالي 😁بع بع 😁وكانت تسلخه كف صورته صور وقالتلو ولك حاج لعب زوجي دفعلك مصاري لتساعدني وانت عم تضيع الوقت تحرك ولااااك خاف الجني صار عبد الها لأنو مكتوب على الجن اذا طلع لحدا وماخاف منه بيصير عبد ئلو وبدا يشتغل متل المكوك خلص الغبرة من هون وكانت دلقت سطولة المي وقالتلو شطوف وكل ما يوقف تكون سلختو طيارة على رقبتو وتقلو اشتغل ولاك لحتى هلك وقلها لك دخيل الله عتقيني رجعت سلختو الكف قلها إذا عتقتيني بعطيكي جرة دهب قالتلو من لك الدهب قلها وعديني تعتقيني ووعدته وهو ركض على القبو وطالع منه جرة دهب كبيرة وحطها قدامها وقال خاطرك وشمع الخيط وهرب وهي طق عقلها من الفرح اخدت كمشة دهب وباعته واشترت عفش جديد وحلق دهب وجوز مباريم وجرن كبة ولحمة وبرغل وطبخت كبة وتزينت وقعدت تستنا جوزا بالليل قال الرجال أقوم لشوف مرتي شو صار فيا إن شاالله تكون اختفت وخلصت من نقها.. دخل عالبيت تعجب شاف بيت جديد ونضيف وعفش جديد ومضوي وريحة الكبة فايحة بهالبيت وشاف انثى حلوة مزينة قلها مينو انتي قالتلو لك هي أنا مرتك وعم بستناك وحكتلو على اللي صار معها .... فرح وقال صحيح الخير بخير والشر بغير .. وقعدو ياكلو من هالكبة ويضحكو وكملو حياتن بسعادة وهنا توته توته خلصت الحتوته الخلاصة من الحكاية الصبر طيب هي صبرت على زوجها والله كرمها دخلكم بتعرفولي بيت في جني😆😁